LUFTA DHE PAQJA, QINGJI I ARTE, ICARI

Përshkrim

Bibliography:

Gjelosh Gjokaj, lindi në më 25 korrik 1933 dhe ndërroi jetë në vitin 2016. Ai ishte artist i njohur nga Mali i Zi. Shqiptar etnik, lindi në fshatin Miljesh (Shq: Milesh) të Tuzit. Gjeloshi rrjedh nga një familje e njohur shqiptare, të kreut te njohur malësor Baca Kurt Gjokajt. Shkollën e mesme industriale e përfundoi në Novi Sad, ndërsa në Pejë dy vite të shkollës së artit. Për një kohë të shkurtër jep mësim në Negotin, prej ku, në vitin 1958, shkon në Beograd. Duke u njohur si talent, ai regjistrohet në Akademinë e Arteve Pamore ne degen e pikturës dhe diplomohet në zhanrin e grafikës me profesor Boshko Karanoviq, viti 1963. Gjatë periudhës 1964–1969, Gjokaj punoi si profesor në Shkollën e Lartë Pedagogjike në Prishtinë, duke qenë njëri nga nismëtarët për themelimin e Fakultetit të Arteve në Prishtinë (1973). Në vitin 1966, ai përfundoi magjistraturën në Akademinë e Arteve Pamore (ALU) në Beograd, në kursin special për grafikë, dhe më 1967 mori pjesë në vizita studimore në Francë, Itali dhe Gjermaninë Perëndimore, duke zgjeruar njohuritë dhe perspektivën e tij artistike. Gjokaj vendos të vazhdojë karrierën artistike në Itali, ku, më 1977 fiton një mirënjohje të jashtëzakonshme: shpallet piktori më i mirë në Itali për atë vit.

Për shkaqe familjare, në vitin 1983/84 largohet nga Italia dhe vendoset në Augzburg, në Gjermani, ku jetoi dhe krijoi deri në fund të jetës. Si artist me reputacion ndërkombëtar, Gjokaj u emërua profesor në Fakultetin e Arteve Pamore në Cetinë. Në vitin 2000 hapi ekspozitën e tij personale në Galerinë Kombëtare të Kosovës. Me vendim të qeverisë, në vitin 2010 iu nda statusi i krijuesit të jashtëzakonshëm kulturor.

Gjelosh Gjokaj ishte anëtar i shumë organizatave dhe akademive të njohura: Akademisë së Shkencave dhe arteve të Kosovës, Akademisë Dukleane të Shkencave dhe Arteve, Shoqatës së artistëve pamorë të Malit te Zi (që nga viti 1981), Shoqatës së artistëve të Serbisë (që nga 1965) dhe Akademisë së Shkencave, Letërsisë dhe Arteve në Palermo. Gjokaj la një trashëgimi të pasur artistike dhe kulturore, duke kontribuar në zhvillimin e artit pamor në rajon. Ai cilësohet si “babai i artit grafik të Kosovës”.